Toshkentda havo ifloslanishining sabablari laboratoriyada o‘rganilmoqda: namunalar shaharning barcha tumanlaridan olinmoqda

Nima bo‘lyapti?

Atmosfera havosining ifloslanishi, ayniqsa kuz–qish mavsumida, O‘zbekistonning eng dolzarb ekologik muammolaridan biri bo‘lib qolmoqda. Ifloslanish manbalari va ta’sir etuvchi omillarni aniqlash maqsadida Prezident farmoni bilan Ekologiya va iqlim o‘zgarishi qo‘mitasi huzurida Maxsus atmosfera laboratoriyasi markazi tashkil etildi. Bu haqda Zamon.uz xabar berdi..

Tadqiqot qanday olib borilmoqda?

Markaz rahbari, texnika fanlari doktori Zikrilla Alimovning aytishicha, laboratoriyada xalqaro tajribalar va zamonaviy jihozlar asosida atmosifani ifloslantiruvchi moddalarning kelib chiqish manbalari o‘rganilmoqda. Tadqiqotlar havoni ifloslantirishga qaysi omillar eng kuchli ta’sir qilishini ko‘rsatishi kerak. Hozirda Toshkentning barcha tumanlaridan maxsus filtrlar yordamida havo namunalari olinib, laboratoriyada tahlil qilinmoqda: ifloslantiruvchi moddalar manbalari, ularning havo sifatiga ta’siri va meteorologik sharoitlar bilan bog‘liqligi o‘rganiladi. Kelgusida bu tajriba butun respublika bo‘ylab keng joriy etilishi rejalashtirilgan.

Havo kuzda va qishda nega kuchliroq ifloslanadi?

Mutaxassislar havoning sifatiga faqat inson faoliyati emas, ob-havo sharoitlari ham ta’sir qilishini ta’kidlaydi. Uzoq vaqt yog‘ingarchilik bo‘lmasa, havodagi chang miqdori ortishi mumkin, harorat inversiyasi davrida esa ifloslantiruvchi moddalarning yer yuzasiga yaqin qatlamda tarqalishi cheklanadi va ularning to‘planishi kuchayadi. Tadqiqotlarning maqsadi — ifloslanishning asosiy sabablarini aniqlash va uning oldini olish hamda salbiy ta’sirini kamaytirish bo‘yicha ilmiy asoslangan choralarni ishlab chiqishdir.